1 Musa 50

Dung i tinggang ma si Josep tu bohi ni amana i, sai ditatangisi ibana huhut diumma.

Dung i ditonai si Josep ma angka naposona, angka datu i, asa dihapuri amana i. Jadi dihapuri angka datu i ma si Israel.

Jadi opatpulu ari ma lelengna diula nasida, ai na sai leleng do somal ariari pangkapuron. Jadi sai ditatangisi halak Misir ibana pitupulu borngin lelengna.

Jadi dung salpu angka ari pangandunganna i gabe didok si Josep ma tu isi ni bagas ni raja Firaun: Molo tung asi rohamuna mida ahu, sai patolhas hamu ma hatangkon tu pinggol ni raja Firaun:

Dipatolon damang i do ahu, ninna: Ida ma, na mate ma anggo ahu; ingkon di tanoman, na huhali di ahu, di tano Kanaan i, tusi ma tanomonmu ahu. On pe, loas nangkok, asa hutanom damang, dung i mulak ahu.

Dung i ninna raja Firaun ma: Nangkok ma ho, tanom ma amanta i, songon naung niuarihonmu.

Jadi nangkok ma si Josep laho mananom amana i; nangkok dohot sude naposo ni raja Firaun rap dohot ibana, ro di sintua ni bagasna i dohot sude angka sintua ni tano Misir i.

Ro di sude isi ni bagas ni si Josep dohot angka hahaanggina i, ro di isi ni bagas ni amana i; holan angka anakkonnasida dohot birubirunasida dohot lombunasida tading di tano Gosen.

Nangkok ma udur dohot ibana nang angka hureta, nang angka parsihundul, tung na torop situtu do nasida na sauduran i.

Jadi dung sahat nasida ro di pardegean Atad, na di bariba ni Jordan, digogo nasida ma disi mangondasi, arga pitu borngin lelengna diandungi si Josep amana i.

Jadi dung diida isi ni tano i, halak Kanaan i, pangondason na di pardegean Atad i, angka ninna ma: Hinamago bolon maon di halak Misir. Ala ni do umbahen Abel Misraim goar ni pangulonan i didok halak, na di bariba ni Jordan.

Dung i dipatupa angka anak ni si Israel ma tu ibana, songon naung tinonahonna i tu nasida.

Diusung angka anakna i ma ibana tu tano Kanaan, jala ditanom ibana di liang ni hauma Makpelah, tondong ni Mamre, na tinuhor ni si Abraham rap dohot hauma i sian si Epron, marga Het i, bahen parbandaan hapunjungan.

Jadi dung ditanom nasida amana i, mulak ma si Josep tu tano Misir, ibana dohot angka hahaanggina i, dohot sude angka na nangkok rap dohot ibana mananom amana i.

Alai mabiar do angka hahaanggi ni si Josep, dung mate amanasida i, angka ninna nasida ma: Atek tung beha dihosom si Josep hita maon, gabe dipasudol tu hita sude na roa, na itabahen i tu ibana.

Jadi martona ma nasida tu si Josep, ninna: Hata ni amanta tu hami, tagan so mate dope ibana:

Songon on ma dok hamu tu si Josep: Sai marpamuati ma roham di hajahaton ni hahaanggim dohot di dosanasida i, ai tung na roa do na binahennasida i tu ho; on pe, sai marpamuati ma roham di hajahaton ni angka naposo ni Debata ni amanta i! Alai tangis do anggo si Josep, dung didok nasida songon i tu ibana.

Dung i laho dohot angka hahaanggina i, marsinggang ma nasida tu jolona, angka ninna ma: Ida ma hami on, naposom ma hami.

Dung i ninna si Josep ma mandok nasida: Unang hamu mabiar, ai nda guru di Debata do nang ahu?

Na jat do nian tutu tahi ni rohamuna dompak ahu, alai na denggan do hapatean ni dibahen Debata, patupahon songon na niidamuna sadari on, laho pangoluhon bangso na bolon.

On pe, unang mabiar hamu, ahu ma marmuduhon hamu dohot anakkonmuna i. Dung i diapul ma nasida pasabamhon rohanasida.

Jadi maringan di tano Misir ma si Josep, ibana dohot isi ni jabu ni amana i, jala mangolu si Josep saratus sampulu taon lelengna.

Jadi sanga diida si Josep pinompar ni si Epraim ro di sundut patoluhon; angka anak ni si Mahir pe, tubu ni si Manasse, tu ampuan ni si Josep do ditubuhon.

Dung i didok si Josep ma tu angka hahaanggina i: Na mate ma anggo ahu, alai sai tingkiron ni Debata do hamu sogot, jala togihononna hamu ruar sian tano on tu tano na niuarihonna i tu si Abraham, si Isak dohot tu si Jakkob.

Dung i dipatolon si Josep ma angka anak ni si Israel, ninna ma: Sai na tingkiron ni Debata do hamu sogot, ingkon boanonmu ma dohot holiholingku sian on!

Jadi mate ma si Josep marumur saratus sampulu taon, gabe dihapuri nasida ibana, jala dipamasuk ibana tu bagasan batang di tano Misir.